Bara ein velta, onei, segjum 4

Þær voru nú einar fjórar velturnar í rallinu um helgina.  Fyrst veltu þeir Jón Bjarni Hrólfsson og Borgar Ólafsson Subaru bíl sínum á miklum hraða hjá Kleifarvatni, þeir leiða Íslandsmótið og máttu ekki við því að detta úr keppni svo gert var við bílinn um nóttina á verkstæðinu Bílnet í keflavík, það tókst en þeir áttu við vandræði að stríða og enduðu aftarlega.

Næstir til að velta bíl sínum voru þeir Aðalsteinn Jóhannsson og Heimir Snær Jónsson á Mitsubishi Evolution X, þeir komu vitlaust yfir hæð á Tröllhálsi á hátt í 200 kílómetra hraða, fóru útaf og ráku vinstri hliðina í barð, köstuðust í loft upp, snerust nokkra hringi í loftinu og lentu aftur á bílstjórahliðinni.  "Hristur, en ekki hrærður" sagði Aðalsteinn eftir byltuna.

Þriðju í röðinni voru svo þeir Óskar Sólmundarson og Valtýr Kristjánsson á Peugeot, þeirra för leit út fyrir að enda á Kaldadal með kútoltinn bíl langt utan vegar.  En líkt og með Subaru bifreið Jóns og Borgars var bílnum skutlað inn á verkstæði á Suðurnesjum (næsta verkstæði, Bílar og hjól) og hann lagaður snarlega, svo snarlega að með ólíkindum þykir.

Fjórðu og síðastir í röð veltandi rallara í þessari keppni voru þeir Baldur Franzson Jezorski og  Elías Ilja Karevsky á Jeep Cherokee.  Þeir luku sinni keppni á næstsíðustu sérleið keppninnar sem lá um Ísólfsskála og Djúpavatn.  Eitthvað vönkuðust þeir félagar við veltuna en þrátt fyrir að allar velturnar hafi átt sér stað á milli 150 og 180 kílómetra hraða teljast engin slys hafa orðið á neinum, en rallý er hættuleg íþrótt og öryggisbúnaður mikill og ef einhver vafi er um heilbrigði ökumanna er þeim ekið beint á sjúkrahús.

Pétur Sigurbjörn Pétursson og Björn Ragnarsson á Mitsubishi Evo VI sigruðu eftir harðann og dramatískann slag.

Bílvelta í rallkeppni